ଶିଶୁ ଯୌନ ନିର୍ଯାତନା ଘଟଣା ଲୁଚାଇଲେ ଚାଲିବ ଆପରାଧିକ ମାମଲା: ସୁପ୍ରିମକୋର୍ଟଙ୍କ ଗୁରୁତ୍ୱପୂର୍ଣ୍ଣ ରାୟ

ପୋକ୍ସୋ ଆକ୍ଟ ଅଧୀନରେ ସୁପ୍ରିମକୋର୍ଟ ଏକ ଗୁରୁତ୍ୱପୂର୍ଣ୍ଣ ରାୟ ପ୍ରକାଶ କରିଛନ୍ତି। କୋର୍ଟ କହିଛନ୍ତି, କୌଣସି ପୀଡ଼ିତ ଶିଶୁଠାରୁ ସିଧାସଳଖ ସୂଚନା ମିଳିବା ପରେ ସ୍କୁଲ କର୍ତ୍ତୃପକ୍ଷ କିମ୍ବା ଅନ୍ୟ କୌଣସି ବ୍ୟକ୍ତି ନିଜ ସ୍ତରରେ ଗୁପ୍ତ ଯାଞ୍ଚ କରି ପୁଲିସକୁ ନଜଣାଇ ପାରିବେ ନାହିଁ। ଏପରି କଲେ ତାହା ଦଣ୍ଡନୀୟ ଅପରାଧ।

କ’ଣ ଥିଲା ମାମଲା

ଆସାମର ଗୁଆହାଟୀ ସ୍ଥିତ ଏକ ସ୍କୁଲରେ 8 ବର୍ଷର ଜଣେ ଛାତ୍ରୀଙ୍କୁ ଜଣେ ସିନିୟର ଛାତ୍ର ଯୌନ ନିର୍ଯାତନା ଦେଇଥିଲା। ପୀଡ଼ିତା ଏନେଇ ନିଜ ଭଉଣୀ ଓ ସ୍କୁଲର ପ୍ରଧାନ ଶିକ୍ଷୟିତ୍ରୀଙ୍କୁ ଜଣାଇଥିଲେ।

କିନ୍ତୁ ପ୍ରଧାନ ଶିକ୍ଷୟିତ୍ରୀ ପୋକ୍ସୋ ଆଇନ ଅନୁଯାୟୀ ତୁରନ୍ତ ପୁଲିସକୁ ଜଣାଇବା ପରିବର୍ତ୍ତେ ନିଜେ ଯାଞ୍ଚ କରିଥିଲେ। ଶିଶୁଟିର ଗୁପ୍ତାଙ୍ଗରେ କ୍ଷତ ଓ ଫୁଲା ଦେଖିବା ସହ ଅଭିଯୁକ୍ତ ଛାତ୍ରକୁ ପଚରାଉଚରା କରି ‘କିଛି ଘଟିନାହିଁ’ ବୋଲି ନିଷ୍ପତ୍ତି ନେଇଥିଲେ। ଏପରିକି ଏହି ଘଟଣା ବିଷୟରେ କାହାକୁ ନକହିବା ପାଇଁ ଅନ୍ୟ ଛାତ୍ରଛାତ୍ରୀଙ୍କୁ ଚାପ ମଧ୍ୟ ପକାଇଥିବା ଅଭିଯୋଗ ହୋଇଛି।

ସୁପ୍ରିମକୋର୍ଟଙ୍କ ରାୟ

ଜଷ୍ଟିସ ମନୋଜ ମିଶ୍ର ଓ ଜଷ୍ଟିସ କେ.ଭି. ବିଶ୍ୱନାଥନ*ଙ୍କ ଖଣ୍ଡପୀଠ ନିମ୍ନ ଅଦାଲତ ଓ ଗୁଆହାଟୀ ହାଇକୋର୍ଟଙ୍କ ଦ୍ୱାରା ପ୍ରଧାନ ଶିକ୍ଷୟିତ୍ରୀଙ୍କୁ ମୁକ୍ତ କରିବାର ନିର୍ଦ୍ଦେଶକୁ ରଦ୍ଦ କରିଛନ୍ତି। କୋର୍ଟ କହିଛନ୍ତି, ପୋକ୍ସୋ ଆଇନର ଧାରା 19(1) ଅନୁଯାୟୀ ପୀଡ଼ିତ ଶିଶୁଠାରୁ ସିଧାସଳଖ ସୂଚନା ମିଳିଲେ ତାହାକୁ ସତ୍ୟ ବୋଲି ଧରି *ତୁରନ୍ତ ମାମଲା ରୁଜୁ କରିବା ବାଧ୍ୟତାମୂଳକ।

କୋର୍ଟ ଆହୁରି କହିଛନ୍ତି, ପୁଲିସକୁ ନଜଣାଇ ନିଜେ ତଦନ୍ତ କଲେ ଗୁରୁତ୍ୱପୂର୍ଣ୍ଣ ପ୍ରମାଣ ନଷ୍ଟ ହେବାର ଆଶଙ୍କା ରହେ, ଯାହା ମାମଲାକୁ ଦୁର୍ବଳ କରିଦିଏ। ଅପରାଧ ଘଟିଛି କି ନାହିଁ ତାହା ପୁଲିସ ତଦନ୍ତ କରିବ, ସ୍କୁଲ ନୁହେଁ।

ପୀଡ଼ିତାଙ୍କ ମା’ଙ୍କ ଆବେଦନ ଶୁଣାଣି ପରେ ସୁପ୍ରିମକୋର୍ଟ ପ୍ରଧାନ ଶିକ୍ଷୟିତ୍ରୀଙ୍କ ବିରୋଧରେ ଆପରାଧିକ ମାମଲା ଚଳାଇବାକୁ ନିର୍ଦ୍ଦେଶ ଦେଇଛନ୍ତି। ସେହିପରି ସ୍କୁଲର ଅନ୍ୟ ଶିକ୍ଷକ ଓ ହଷ୍ଟେଲ ୱାର୍ଡେନଙ୍କୁ ମାମଲାରୁ ମୁକ୍ତ ରଖାଯାଇଛି, କାରଣ ସେମାନଙ୍କ ପାଖରେ ସିଧାସଳଖ ସୂଚନା ନଥିଲା।

କ’ଣ କହୁଛି ଆଇନ

ପୋକ୍ସୋ ଆଇନର ଧାରା 21 ଅନୁଯାୟୀ ଶିଶୁ ପ୍ରତି ହେଉଥିବା ଅପରାଧର ସୂଚନା ଲୁଚାଇଲେ 6 ମାସ ପର୍ଯ୍ୟନ୍ତ ଜେଲ ଦଣ୍ଡ, ଜରିମାନା କିମ୍ବା ଉଭୟ ଦଣ୍ଡ ହୋଇପାରେ।

ଏହି ରାୟ ପରେ ସ୍କୁଲ ଓ ଅନ୍ୟ ସଂସ୍ଥା ଗୁଡିକ ପାଇଁ ଏକ କଡା ବାର୍ତ୍ତା ଯାଇଛି ଯେ, ଶିଶୁ ନିର୍ଯାତନା ଘଟଣାରେ ତୁରନ୍ତ ପୁଲିସକୁ ସୂଚନା ଦେବା ବାଧ୍ୟତାମୂଳକ।